di Carlo Ernesto Panetta
‘A fossa i Corzu Vittoriu
Me’ Sindicu, vi scrivu sti ddu’ righi
ca vogghj’ u stabilimu ‘nu discurzu;
non mi pigghjàti pe’ ‘nu ‘ttaccabrìghi,
ma vorrìa u sacciu quantu sìt’i purzu.
Vu’ cumandati ‘nu paìsi sanu,
distribuiti l’ordin’i lavuru
ma vi fàti pigghjàri semp’a manu
i cu’ vi dassa sulu ‘mmenz’’o scuru;
oppuru sìti vu’ lu negligenti
chi non guardat’’i cosi d’’u paìsi,
facendu mu si ‘ncazza semp’’a genti,
e puru chilla ch’ ‘u votu vi misi?
Eu sugn’’a fossa di Corzu Vittoriu
Emanueli chi , comu sapìti,
fu Re d’Itaglia; non è ‘bbligatoriu
mò u rilaprìmu certi feriti.
Però vi dicu ca sugnu ‘mportanti,
ca sugnu larg’armenu ddu’ metri
e non è giust’u s’arrìdunu tanti
‘tomobilisti chi megghju d’’i petri
si ‘mmaginavanu ch’èr’ e potìa
star’accussì ccìtta ccìtt’e pistata
comu tamburu di ‘na batterìa
i tutti chilli chi fannu ‘sta strata.
Sugn’’a cchjù randi di li soru mei,
chilli chi sunnu ‘n giru ‘nt’a città
chi si lamentan’i quanti babbei
sbattun’’i gummi senza pietà
e po’ jèstimanu l’anima vostra,
chjaman’’a Diu, la Madonna, li Santi,
ca tutti ballanu comu ‘nt’’a giostra
e si ricordan’i Vui Cumandanti.
Eu pensu sempi c’’o “tappetinu”
fu ‘nu ricordu nt’’e generazioni;
quant’era bellu, piacevul’e finu!
Nu’ atti fossi jèmu ‘n pensioni.
Ma mò vi pregu, cacciàtim’ i ccà,
parru pe’ mia e pe’ tutt’’i me’ soru,
e Vui chi ndavìti l’atorità
‘nsem’’a chill’atti dassàtim’ u moru!
Carlo Ernesto Panetta
Locri 19/01/2017
