di Carlo Ernesto Panetta
E mi stendicchju l’ossa chjanu-chjanu,
mi fazz’’a cruci cu la manu destra;
e lu me’ Diu mi pigghja di la manu,
mi mmostr’’a strata giusta…la Maestra.
Ccussì cuminciu sempi la jornata,
quandu mi arzu semp’ogni matina
e pensu ca ‘sta Terra ‘ssulicata,
chi ridducìmma comu ‘na mappina,
esti ‘nt’’e vrazza Soi, stringiùt’’o cori,
mentri cu strafuttenza, quasi sdegnu,
stamu facendu sulu pemmu mori,
senza nullu rispettu, né cuntegnu.
‘Mbìdia, malignità e ‘pocrisìa
sunn’’u bagagli’ amaru di ‘sta vita;
cancellamma pursìnu l’armonia,
comu ‘na gumma faci c’’a matita.
Risbigghjamundi, genti, pe’ favuri!
Facimundi ‘na bella doccia frisca!
Facìmu ‘n cori nostr’u nèsci ‘a..muri.
“Cu’ esti piscaturi sap’’u pisca”!
CarloErnestoPanetta
Locri 09/11/2016
