Il poeta locrese Ernesto Panetta offre alla lettura degli aficionados di Lente Locale questa poesia scritta di getto dopo le notizie relative alla presenza di topi in alcune scuole cittadine. Godiamocela.
‘U TERREMOTU D’’I SURICI
E finarmenti si movi ccocchj cosa!
Armenu pe’ lli povari figghjoli
i Calvi-SantaMonica studiosa,
già nominat’ ‘a megghju di li scoli.
Rrivàru puru llà surici grossi!
Chi dicu ? Sunnu grossi com’’e gatti!
Su’ comu terremot’ a milli scossi;
in itaglianu si dici ca su’ “ratti”.
‘U Sindac’ ‘i lezioni suspendìu
pe’ pochi jorna, comu si cumbeni;
i mia, sicuramenti, si sperdìu;
si vidi ca non su’ tantu perbeni.
‘Ndavi tri settimani chi l’aspettu
pemmu risorvi pur’’u casu meu,
e ‘ntantu ‘mmazzu suric’ e li jettu,
‘i vivi, semp’ i cchjù, vann’a corteu.
Si ‘nteressau, ped’essiri, ll’amaru,
ma finìu llà, doppu pigghjàt’’u ‘mpegnu;
ca li ‘mpiegati ‘n giru mi pigghjaru
pensandu c’’o Cumun’ è loru regnu.
Mi dìssaru ca fìciar’’u ‘nterventu
e pờ tornavan’a ‘na decin’e jorna
ma forzi ca sbagghjaru lu cumbentu,
ed eu su’ ccà c’’aspettu cu’ non torna.
Chiusi ‘nt’’a casa, tutti sequestrati,
campàmu c’’a paura di ‘nfezioni;
fora ‘n giardinu, cosi ‘bbandunati
e ccà nullu suspendi li lezioni.
Pensati si cumprend’a lli figghjoli
chi cchjù di mia su’ tutti ‘nnocentelli.
Chimmu nci pigghja ‘nu dolur’’i moli
a chilli chi si fannu “sulu belli” !
CarloErnestoPanetta
Locri 27/10/2016
